चितवन । भरतपुरको विपी कोइराला क्यान्सर अस्पतालमा उपचारको लागि आएका चिनियाँ नागरिक मृत भेटिएका छन् । यहि असार १० गते उपचारको लागि क्यान्सर अस्पताल आएका ५६ वर्षका चिनियाँ नागरिक बियान चाङ्क्सिन आज बिहान अस्पताल बाहिरको होटलमा मृत भेटिएका हुन् ।

जिल्ला प्रहरी कार्यालय चितवनका डिएसपी भेषराज रिजालका अनुसार क्यान्सर अस्पताल अगाडिको वर्षाना होटलको कोठा नम्बर ११९ मा बसी उपचार गराइरहेका उनी आज मृत भेटिएका हुन् । बिहान ८ बजेर ५५ मिनेटमा होटलको ट्वाइलेटमा घोप्टी परेको अवस्थामा मृत भेटिएको जानकारी प्राप्त भएको डिएसपी रिजालले जानकारी दिए । उनका अनुसार मृतक चिनिया नागरिकको बारेमा नेपालस्थित चिनिया राजदुतावासमा कुराकानी भइसकेको छ ।

राजदुतावाससँगको समन्वयमा शव व्यवस्थापन तथा अनुसन्धानको प्रकृया अघि बढाइने डिएसपी रिजालले नेपाल प्रेसलाई जानकारी दिए । डिएसपी रिजालका अनुसार ६ दिनदेखि बियान होटलमा एक्लै बस्दै आएका थिए । उनी नेपाल उपचार बाहेक कुन प्रयोजनमा बस्दै आएका थिए भन्ने पनि नखुलेको डिएसपी रिजालले जानकारी दिए ।