कैलाली; अस्पतालमा दिनहुुँ कोरोना संक्रमितसंगै अन्य बिरामीहरुसमेत बढ्न थालेपछि खानाको समस्या हुने नै भयो । कोरोनाबाहेक अन्य रोगका बिरामी भर्ना भएपछि साथमा कुरुवासमेत बस्नुपर्छ । अस्पतालमा क्यान्टिन त छ तर निशुल्क हैन । लकडाउनको समय साथमा भएको सिमित पैसाभन्दा बढी बिरामीको उपचारमै खर्च हुन्छ । यसैलाई मध्यनजर गर्दै, युवा संघ नेपाल युवा शक्ती विभागले  सुरु गरे बिरामी तथा कुरुवालाई निशुल्क खाना वितरण अभियान । यो अभियानमा युवा शक्ति विभागका प्रमुख एवं स्थायी कमिटी सदस्य अशोक रावलको नेत्रित्वमा संघका केन्द्रिय कमिटी सदस्यहरु तथा मातहतका कमिटीमा आबद्ध युवाहरुपनि सामेल छन् ।

बिभाग प्रमुख रावलका अनुसार खाना मात्र नभएर बिहानको नास्तामा दूध र अन्डासमेत व्यवस्था गरिएको छ । यो अभियान कोभिड नसकिदा सम्म नै चलाउने उनको भनाई छ । “कोभिड नसकिदासम्म हामी यो अभियान सञ्चालन गरिरहन्छौं”, उनले भने, “अहिलेलाई बिहान दूध र अण्डा, १० बजेदेखि ११ बजेको बीचमा खाना र बेलुका ५ देखि ६ बजेको बीचमा खानाको व्यवस्था गरेका छौं ।”

युवा नेता रावलले अस्पतालमा पटकपटक बिरामीलाई सहयोग गर्न आउदा मुख्यतः खानाको समस्या देखेको र बिरामीहरु टाढा टाढा देखि आउने भएकाले खाना ल्याउन गार्हो हुने र अहिले लकडाउन भएकाले बाहिर होटेलहरुसमेत बन्द हुने भएकाले यो अवधारणा आएको बताए । यो संगै नेता रावलले अहिले युवाहरु मिलेर नै अभियान सुरु गरेको बताउदै परिस्थिति सहज नभए सम्म अभियानलाई निरन्तरता दिनेसमेत बताए । “अस्पतालमा पटकपटक बिरामीहरुलाई सामान सहयोग गर्न आउँदा यहाँ खानाको बढी समस्या देखियो । भजनी, सुखड, मोहन्यालबाट आएको बिरामीलाई दिनहुँ खाना बोक्न समस्या भइरहेको छ र बाहिर होटेल पनि बन्द छन् त्यसैले हामीले यो अभियान सञ्चालन गरेका हौं”, रावलले भने, “ विभागको ब्यानरमा अहिले टिकापुरमा  अभियानको सुरुवात गरेका छौं  र संघको निर्देशनानुसार देशैभर दश हजार स्वंसेवक परिचालन गरिएको छ।