नेपाली फिल्म क्षेत्रका चार चकलेटी स्टार नायकहरूको भिडन्त पक्का भएको छ । बारम्बार फिल्म जुध्दा त्यसले बक्स अफिसमा पारेको प्रभावको विषयमा नेपाली मेकरहरुलाई राम्रैसँग जानकारी छ ।

जेठको १० गते फिल्म ‘फर्की फर्की’का मेकरले प्रदर्शन मिति तोकेका थिए । अनमोल केसी र जसिता गुरुङको मुख्य भूमिका रहेको यो फिल्ममा सुयोग गुरुङको लेखन तथा निर्देशन छ । फिल्मलाई रोहित अधिकारीले निर्माण गरेका हुन् ।

यो मितिमा नायिका पूजा शर्मा र नायक कुन्साङ बोमजोमको मुख्य भूमिका रहेको फिल्म ‘दान्भी’ पनि रिलिज हुने भयो । यसलाई पूजा र अनमोलबिचको इगोको लडाइको रुपमा हेरिएको छ । अब, यही मितिमा फिल्म ‘पुजार सार्की’ पनि रिलिज हुने भएको छ । दिनेश राउतको निर्देशनमा तयार भएको फिल्ममा आर्यन सिग्देल, प्रदीप खड्का र पल शाह मुख्य भूमिकामा छन् ।

फिल्म क्षेत्रका स्टारहरू एकसाथ भिड्नु आफैंमा दुःखद कुरा हो । यी फिल्महरूलाई सल्लाहमा मिलेर रिलिज गर्न सकिन्थ्यो । तर, यहाँ इगोले सर्वाधिक धेरै काम गर्न पुग्यो । जसकाकारण, जेठको १० गते त्रिपक्षिय भिडन्त पक्का भएको हो ।

निर्माता र निर्देशकबिचको इगोका कारण आर्यन सिग्देल, प्रदीप खड्का र पल शाहको फिल्म अनमोल केसीसँग जुध्ने पक्का भएको छ । चार चकलेटी नायकहरू इगोको लडाइमा नमज्जाले पिल्सिने देखिएको छ ।