काठमाडौं । आउँदो बर्षको असारको २८ गतेबाट रिलिजमा आउन लागेको फिल्म ‘घर ज्वाइँ’को फस्टलुक सार्वजनिक भएको छ । यो फिल्ममा नायक दयाहाङ राई र नायिका मिरुना मगरलाई देख्न सकिन्छ ।

फिल्ममा सुशन प्रजापतिको छायांकन छ । यो फिल्ममा दया र मिरुनाको साथमा बुद्धि तामाङ, पुष्कर गुरुङ, शिशिर वाङ्देल, भोलाराज सापकोटा, खड्गबहादुर पुन, राज थापा, कविता आले लगायतका कलाकारको अभिनय छ ।

एउटा पोस्टरमा दयाले बन्दुक बोकेर रिसाहा अवतारमा आफूलाई प्रस्तुत गरेका छन् भने अर्कोमा मिरुना र दया डोको बोकेर हिँडिरहेको देख्न सकिन्छ । फिल्मलाई अनिल बुढाले निर्देशन गरेका हुन् । फिल्मको कथा, पटकथा तथा संवाद लेखनमा अनिललाई विनोद खतिवडा र सुभाष कोइरालाले साथ दिएका छन् ।

एम मुभिजको ब्यानरमा निर्माण भएको यो फिल्ममा हर्क साउद र मनोज थापाको शब्द तथा संगीत, रामजी लामिछानेको कोरियोग्राफी, कृष्ण भण्डारीको सम्पादन छ ।