काठमाडौं । चलचित्र निर्माता संघले हलबाट पहिलो हप्ता ६० प्रतिशत सेयर निर्माताले पाउनु पर्ने बताएको छ । पहिलो हप्ता ५० प्रतिशत सेयर पाउँदै आएका निर्माताले १० प्रतिशत सेयर थपेर ६० प्रतिशत पुर्याउन माग गरेका हुन् । दोस्रो हप्ता ५० र तेस्रो हप्ताबाट चलचित्र नउत्रिदासम्म ४० प्रतिशत सेयर पाउनु पर्ने संघको माग छ । अहिले दोस्रो हप्ता पनि ५० प्रतिशत र तेस्रो हप्तादेखि नउत्रिदासम्म ३५ प्रतिशत सेयर निर्मातले हलबाट पाउँदै आएका छन् । आफूले अगाडि सारेका यी माग लागु गर्न संघले विभागीय मन्त्रालयसमक्ष माग पनि गरेको छ ।

केही समय अगाडि काठमाडौंमा आयोजित निर्माताहरूको भेलाले तय गरेको माग संघले मन्त्रालयमा बुझाएको छ । संघको यो माग भने चलचित्र संघले पूरा गर्नु पर्नेछ । चलचित्र संघले सबै माग कसैले राख्दैमा पूरा हुन्छन् र गर्नुपर्ने वाद्ययात्मक अवस्था नरहेको बताइसकेको छ । यद्यपि, छलफलका लागि उसले वार्ता कमिटी गठन गरिसकेको छ । निर्माता संघले पनि वार्ता टोली गठन गरेको छ ।

चलचित्र संघले महासचिव नरेन्द्र महर्जनको संयोजकत्वमा पाँच सदस्यीय वार्ता कमिटी गठन गरेको छ । जसमा भाष्कर ढुंगाना, गोपालकाजी कायस्थलगायत सदस्य छन् ।

निर्माता संघले महासचिव सुनीलकुमार थापाको संयोजकत्वमा सात सदस्यीय वार्ता कमिटी गठन गरेको छ । वार्ता कमिटीमा रामबाबु गुरुङ, खगेन्द्र लामिछाने, दीपकराज गिरी, ज्ञानेन्द्र देउजालगायत सदस्य छन् ।